Qarabağda fəaliyyət göstərən ilk kinostudiya “Hoçazfilm” 15 -18 oktyabr tarixlərində Türkiyədə II Yalova Beynəlxalq Film Festivalında Azərbaycanı təmsil edib.
Bakı Abadlıq Xidməti tərəfindən Laçında yaradılan kinostudiyanın direktoru, rejissor Amil Məmibəyli festival çərçivəsində təşkil olunan müzakirə panelində çıxış edərək “Hoçazfilm”in fəaliyyəti, studiyanın məqsədləri və hədəfləri barədə məlumat verib. O, həmçinin Azərbaycan və Türkiyə arasında kino sahəsində əməkdaşlığın inkişaf perspektivlərinə toxunub.

Bakı Abadlıq Xidməti Göygöl rayonunda genişmiqyaslı abadlıq və bərpa işləri həyata keçirir. Xidmətin əməkdaşı İsrafil Fərəcullayevin verdiyi məlumata görə, Gəncədən Toğanalı kəndinə gedən yol boyunca Qızılqaya, Hacıkənd qəsəbələri, Aşıqlı və Yeni Zod kəndləri ərazisində yerləşən yaşayış evlərinin fasadları təmir olunur, köhnə dam örtükləri yenilənir, qapı və pəncərələr bərpa edilir. Qapılar rənglənir, hasarlar səliqəyə salınır, həyətyanı sahələrin giriş hissələrinə tamet daşları döşənir, bardürlər yenilənir və yaşıllıq zonalarında təmizlik işləri aparılır.

Zerti Aqrosənaye Parkında yerləşən "Pirshaghi" ayaqqabı fabriki Laçındakı 2 saylı orta məktəbin bütün şagirdlərinə yeni tədris ilinin başlanması münasibətilə ayaqqabı hədiyyə etdi.

Bir neçə ay əvvəl fəaliyyətə başlayan Laçın filialı 160 məktəblini sevindirdi.

Yüksək keyfiyyətli məhsulların yerli sənətkarlar tərəfindən hazırlanması hədiyyənin simvolik dəyərini artırır.

Sentyabrın 30-da Gəncə Şəhər İcra Hakimiyyəti, Azərbaycan Respublikası Mədəniyyət Nazirliyinin Gəncə-Daşkəsən Regional Mədəniyyət İdarəsi, “Bakı Abadlıq” Xidməti və Azərbaycan Fotoqrafları Birliyinin (AFB) təşkilatçılığı ilə Gəncə şəhərində “Əsrlərin şahidi Gəncə” adlı fotosərgi keçiriləcək. Gəncə Dövlət Filarmoniyasının Urban Mərkəzində baş tutacaq sərgidə şəhərin tarixi simasını, urbanistik inkişafını və abadlaşdırma proseslərini sənədli kadrlarla əks etdirən fotolar nümayiş olunacaq.

Bu sərgidə ilk dəfə olaraq Azərbaycanın ilk fotoqrafı, 1880–1910-cu illərdə Gəncədə fəaliyyət göstərmiş Məşədi Abbasəli Abbasovun XIX əsrin sonu – XX əsrin əvvəllərinə təsadüf edən orijinal fotoları da təqdim ediləcək. 

Gəncənin siması olan tarixi binaların çoxu kərpicdən tikilib. Yüz ildən çox yaşı olan həmin tikililər bu müddətdə kənar müdaxilələrə məruz qalıb, kərpic divarları dəfələrlə suvayıb rəngləyiblər. Bu isə kərpiclərin daxildən dağılmasına səbəb olub.

Gəncədə aparılan təmir-bərpa işləri zamanı 10-a yaxın tarixi abidə, bina və hasarlar, tarixi məhəllələrin girişləri təmizlənib bərpa olunub. Kərpic divarların üst səthi ilk növbədə mexaniki yolla, əllə təmizlənib. Çətin təmizlənən yerlərdə xüsusi dərmanlardan, həmçinin yüksək təzyiqli buxardan və sudan istifadə olunub.

Divarların üst qatındakı rənglər çıxarılıb, kərpiclərin arasındakı zədələnmiş köhnə maddələr sökülüb. Təmizlənmə prosesindən sonra kərpiclərin üst səthləri bərpa olunub, zədələnmiş kərpiclər yenilərilə əvəz edilib.

26 avqust Laçın şəhəri günü münasibətilə yeni maraqlı layihə təqdim edildi. Zerti Aqro-Sənaye parkında regionda ilk dəfə böyük alış-veriş məkanı - Laçın həftə bazarı fəaliyyətə başladı.

Layihənin əhəmiyyəti ondan ibarətdir ki, Laçın işğaldan azad olunandan sonra yaylaqlara köçən, orada orqanik keyfiyyətli məhsul istehsal edən fermerlərə dəstək məqsədilə nümunəvi bazar modeli yaradılsın. Çünki məhsul istehsal edən kəndli çox zaman alıcıyla birbaşa əlaqə qurmaqda çətinlik çəkir. Həftə bazarı isə imkan verəcək ki, insanlar məhsulu birbaşa istehsalçının özündən alsınlar, heç kəsə əlavə vəsait ödəməsinlər.

Azərbaycan Respublikasının Prezidenti İlham Əliyev və birinci xanım Mehriban Əliyeva Kəlbəcər şəhərində 1-ci yaşayış kompleksinin ərazisində fərdi və çoxmərtəbəli evlərdə yaradılan şəraitlə tanış olub, buraya köçən sakinlərlə görüşüblər. 33 ildən sonra doğma yurda qayıdan kəlbəcərliləri təbrik edən Prezident, Kəlbəcərin hansı şəraitdə azad edildiyini yada salıb. Ərazini tərk edən ermənilər nəinki evləri, hətta meşələri də yandırırdılar.

Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 20-də Gəncə şəhərində  aparılan abadlıq və yenidənqurma işlərinin gedişatı ilə tanış olublar.

Qeyd edilib ki, “Bakı Abadlıq Xidməti” MMC tərəfindən şəhərin 637 yaşayış və qeyri-yaşayış binasının fasadı təmir edilib, 1159 binanın dam örtüyü yenilənib. 49 küçə və prospektdə işıqlandırma sistemləri qurulub, 62 ünvanda fasad işıqlandırması yenilənib, 24 fəvvarədə təmir və bərpa işləri aparılıb, 27 min kvadratmetr piyada yolu bərpa olunub.

Azərbaycan Respublikasının Prezidenti İlham Əliyev mayın 27-də “PIRSHAGHI” ayaqqabı fabrikinin Laçın filialının açılışında iştirak edib.

“Laçın Aqro-Sənaye Parkı”nda işə başlayan müəssisələrdən biri də “PIRSHAGHI” ayaqqabı fabrikinin Laçın filialıdır. Müəssisədə əsasən Laçın sakinləri olmaqla 15 nəfər işlə təmin edilib. Müəssisə kişi, qadın və uşaqlar üçün ayda 1500 cüt ayaqqabı istehsal etmək gücündədir. Müasir avadanlıqlarla təchiz olunmuş fabrikdə idman və klassik üslubda ayaqqabılar istehsal edilir.

“Bakı Abadlıq Xidməti” MMC-nin baş direktoru Bünyad Qasımov dövlətimizin başçısı İlham Əliyevə fabrik barədə məlumat verdi.

Qeyd edək ki, Prezident İlham Əliyev və birinci xanım Mehriban Əliyevanın iştirakı ilə 2023-cü il avqustun 26-da açılışı olmuş “Laçın Aqro-Sənaye Parkı” fəaliyyətini genişləndirir. Rayonun Zerti kəndində yerləşən Parkda artıq 12 müəssisə fəaliyyət göstərir.

İslamabadda Azərbaycan Abadlıq Layihələri

Pakistanın paytaxtı İslamabadda həyata keçirilən dörd böyük layihə “Bakı Abadlıq Xidməti” MMC-yə həvalə edilib.

1. Konqres Mərkəzinin müasirləşdirilməsi – 1997-ci ildə istifadəyə verilən mərkəzin ətrafında müasir dizayn və yaşıllaşdırma işləri aparılacaq.

2. Şrinaqar şossesində abadlıq – 25,5 km uzunluğundakı əsas magistral yol boyunca yaşıllaşdırma layihələri icra olunur.

3. Melody Food Park – Bu ərazi istirahət və əyləncə məkanına çevriləcək, kiçik biznes obyektləri bərpa ediləcək və turistlər üçün cəlbedici məkana çevriləcək.

4. Seyidpur kəndinin yenidən qurulması – Tarixi memarlıq qorunmaqla kəndin infrastrukturu yenilənəcək, su və sanitariya sistemi yaradılacaq, yerli sakinlər üçün təlimlər təşkil ediləcək.

Bu layihələr İslamabadın inkişafına töhfə verməklə yanaşı, Azərbaycan-Pakistan əməkdaşlığını daha da möhkəmləndirəcək.

Pakistan İslam Respublikasının Baş naziri Məhəmməd Şahbaz Şərifin Azərbaycana dövlət səfəri çərçivəsində fevralın 24-də Bakıda biznes-forum təşkil edilib.

Azərbaycan Respublikasının Prezidenti İlham Əliyev və Məhəmməd Şahbaz Şərif biznes-forumda çıxış ediblər.

Forumda iştirak edən “Bakı Abadlıq Xidməti” MMC-nin baş direktoru Bünyad Qasımov rəhbərlik etdiyi qurumun Pakistanın paytaxtında həyata keçirdiyi təmir-bərpa layihələri barədə məlumat verib. Qeyd edib ki, “Bakı Abadlıq Xidməti” tərəfindən İslamabadda icra olunan layihələrdən biri yekunlaşıb, üç layihə üzrə isə işlər davam edir.

Zəfər günü Azərbaycan Respublikasının Prezidenti İlham Əliyev dünyanın ən böyük bayrağını yenidən Bakı bulvarındakı tarixi məkanda - Dövlət Bayrağı meydanında ucaltdı. 

Bayrağın ucaldığı məkanda əsaslı abadlıq işləri görülüb. Meydan tamamilə işıqlandırılıb. Əraziyə 52 işıq dirəyi basdırılıb, 102 ədəd Phillips istehsalı olan lampa yerləşdirilib. Meydanda həmçinin yaşıllıq və landşaft işləri də görülüb. 4500 kvadrat metrlik sahəyə qazon döşənib. Xüsusi dizayn olunmuş yerlərə 54 min müxtəlif kol və çiçək əkilib.

Prezident İlham Əliyevin Pakistana səfəri çərçivəsində Baş nazir Məhəmməd Şahbaz Şərifə İslamabadın abadlaşdırılması planı təqdim olunub.

Məhəmməd Şahbaz Şərif: “Biz bu cür planları bəzən İstanbuldan nümunə götürürdük, indi isə Bakıdan nümunə götürürük. Heyətin rəhbəri bu fürsətdən istifadə edib İslamabadı Bakıya oxşadacaq”.